RREMOJ

Ti më sheh vëngër.

Në sytë e tu gjej përçmim.

Ka aty edhe zhgënjim,

ndoshta edhe pak hipokrizi.

Më kot rrëmoj nën ta,

kurrë s’do gjej dashuri.

Elda Koço
1999

DIKUJT

Diç kraharorin po më bren,

Siç bren mola drurin, pa mëshirë.

Një ndjenjë e re po lind,

ashtu si dielli në agim.

Shko zaptonjëse e zemrës sime!

Larg! Të urrej!

Por, si s’mundem vallë nga kraharori

këtë ndjenjë ta shporr?! Më ther!

Dhe po luftoj me veten time,

po qaj e ulëras.

Më mirë pa zemër le të mbes,

Sesa dikujt t’i përkas.

Elda Koço
1995

KTHEHU

Sa dua të kthehesh!

Po lutem çdo çast.

Edhe jetën time,

nuk e dua kaq.

Elda Koço

1998

RENDESE

Më rëndojnë qepallat nga lodhja.

Më rëndon koka nga mendimet.

Më rëndon shpirti nga brengat.

Koha rëndon nga kujtimet.

Elda Koço
1998

S’KA SHPETIM

Përse vallë?

Ç’mu desh që të pash në sy?!

Aty unë u mbyta,

dhe nuk ka shpëtim...

JO TRIUMF

Nga vdekja kam frikë jo pak.

Nga jeta frikë kam shumë.

Tashmë jeta ime të përket

Dhe vdekja s’do ishte triumf.

Elda Gjini
1997

POSHTERIM

M’u lagën qepallat.

M’u trazua gjumi.

M’u neverit dashuria.

Ulëriva dhimbshëm,

si kurrë ndonjëherë,

e fyer, e poshtëruar.

DROGA

Për të qarë,

s’kam më lotë.

Për të dashuruar,

s’kam më forcë.

Të urrej?!

Do ishte e kotë.

Të dua jetën,

s’do kishte kuptim.

Ky pluhur i mallkuar,

po më kthen në hi…

A  MUNDESH?!

A e di e dashur?
Nga nesër s'mund të të dua.
Nga nesër s'mund të dua as veten.
Nesër do vrasësh, do vrasësh...
Unë do jem bashkëpunëtori yt.
A e di e dashur?
Nga nesër s'do më marrë gjumi.
Nëse kam ndërgjegjen e trazuar,
për më tepër, të njollosur,
s'vë gjumë në sytë e përlotur.
Po ti e dashur?
Je ende e gatshme
të shndërrohesh në xhelate
me ndërgjegje të patrazuar?
A mundesh?!

PO HUMB

Koha rend, por jo unë.

Te një çast bëj vendnumëro.

Kam ditë, javë, muaj...

Nga një çast i vetëm,

Mijëra të tjerë po humb.

 MOS

Mos ma merr ti ëndrrën mua!

Mos ma lër ëndrrën jetime!

Mos ma varfëro shpirtin!

S’ka ç’të duhet ëndrra ime.

Mos e vidh. S’të pasuron.

Mos e merr! S’të lumturon.

Mos e mba! S’të përket.

Mos e shit! S’blihet dot.

NDOSHTA

Shpesh kthej kokën pas,

kur eci në rrugë.

Ndoshta kam  lënë një çast,

a ndoshta më shumë.

VEC

Sikur të isha erë!

Të të shpupurisja flokët.

Sikur të isha shi!

Të të lagia deri në palcë.

Sikur të isha diell!

Të të shkaktoja djegie

të shkallës së parë.

Veç oqean të mos isha!

S’do doja kurrë të të mbysja.

DIAMANT

Kurrë s’të kam kërkuar

ar, argjend, flori.

E përse më duhen,

kur diamant të kam ty?

Elda Gjini

I VETMI

Je i vetmi njeri që,

as e dua,

as e urrej.

S’i them një të vërtetë,

por as e gënjej.

Për mua është njësoj

Edhe sikur të mos jesh.

 I PANJOHUR

Dikush aty buzëqesh.

Atje tej disa qeshin me zë.

Dhe ti sheh i habitur.

-Ç’të jetë vallë ajo gjë?!

Mos është një zog,

një zog që sa te njëri,

te tjetri fluturon?

E nëse është një zog,

ti kurrë s’e ke takuar.

Një zog që prej teje,

përjetësisht ka shtegëtuar.

Do qaj

S’do qaj

në më dalshin thinjat.

S’do qaj

në më shkon rinia.

S’do qaj në më duhet të vdes.

Do qaj

në më humb dashuria.

S’JE VETEM

Fiket drita,

mbetet errësira.

Ti mos kujto

se vetëm je.

Je përherë në zemrën time.

Në zemrën tënde përjetë do jem.

S’ME DHIMBSESH

Aspak nuk më dhimbsesh,

as të kam zili.

S’po sakrifikon t’më lumturosh,

po të mos vuash ti.

Elda Koço
1997

UDHEKRYQ

Unë eci udhëve pafund.

Unë endem udhëve pa krye.

Mes tyre kërkoj rrugën time,

në qiell yllin udhërrëfyes.

Por, ylli s’më drejton.

Dhe unë humbas në errësirë.

Të zgjedh një rrugë s’di,

Cila të jetë më e mirë?

S’DUA

Nuk dua të qaj për ty,

do ndihesha fëmijë.

As të vdes për ty,

s’do jetoja për vete.

S’psherëtij ç’ka shkoi,

do ndieja shumë dhembje.

S’dua të të dua,

s’do gjeja prehje.

Elda Koço
1998

DASHURI

Po më dhe nga buzëqeshja jote,

S’kam ç’të të jap veç lotëve të mi.

Po më dhe nga gëzimi yt,

mund të të jap ca trishtim.

Po më dhe dashurinë tënde,

do të të jap dashuri.

S’E DI

Ikën hapat,

u larguan.

Shi i dimrit,

Çapat lan.

S’di nëse diell’i verës,

Qerpikët do mund t’mi thajë.

Elda Koço
1997

IRONIA

E largët është ajo kohë,

Dhe fjalët, ç’të thashë, ç’më the.

Por,  halë në fyt më ka mbetur,

Ajo ironi përçmuese. Përse?!

Elda Koço
1996

TI

Me the dy fjalë të ëmbla.

Ma vodhe përgjithmonë fëmijërinë.

Më dhurove dy çaste të lumtura.

Ma more përjetë qetësinë.

Elda Koço
1995

NJE JETE

Një jetë të tërë të ëndërroja,
do të të ëndërroja veç ty.
Një njeri të vetëm të dashuroja,
do të të dashuroja vetëm ty.

I madh, i pamatë zhgënjimi.
Mbi të vë vulën ti.
Një jetë të tërë do shpenzoj,
për të të harruar ty.

BRENGE

Asgjë ngushëlluese s'kishte ndarja.
Asnjë shpresë s'më ushqeu.
Askujt më vendi s'i përket
Çasti u mbars me brengë.

I RUAJNE

Mos kujto se buzëqeshjet
të përhumbën s'di s'e ku.
Ato në disa zemra,
i ruajnë si triumf.

MERGIM

Mërgove nga jeta ime.
Diku je nisur tani.
Drejt një jete tjetër?
S'dua të jetë shtegëtim.

Mërgove nga jeta ime,
por jo nga shpirti im.
Një pjesë e tij rendi pas teje.
Sikur të kishte kthim!


Elda Koço
1997

VANE

Vanë çastet që jetuam bashkë.
Bashkë me grindjet, vanë.
Dhe ne, krenar e fodullë,
më në sy s'u pam.

Asnjë s'pranoi nga ne,
se pa tjetrin i paplotë qe.
As unë e as ti s'bëm një hap,
që të dy të ktheheshim prap.

S'ISHA ALKOOL

Ç'të kujton emri im?!
Një aventurë?
Humbje kohe?
Çfarë?

Që ndoshta...
E harrove prap,
duke kthyer një gotë,
duke zbrazur shishen në çast.

Në s'më kujton edhe më mirë.
Por, me të tjera mos më ngatërro!
S'isha alkool të të dehja
e më pas të mos kujtoheshe dot.

JASHT ÇMIMEVE

Më thua se çdo gjë ka një çmim,
çdo gjë blihet me para.
Sa shpesh për këtë grindemi
dhe paqe bëjmë prap.

Kur ti ia nis sërish,
më kundërshton gjithashtu,
të them se dashuria s'ka çmim.
Nga gjithçka vlen më shumë.


Elda Koço
1997

NJE

I mbylla dyert frikës,
shtirjes dhe hipokrizisë.
I mbylla veshët, sytë
të mos interferonte njeri.
Pashë e dëgjova shpirtin tim,
vetëm shpirtin tim dhe... ty...
As e kisha kuptuar
që ishit bërë një.


Elda Koço
1996

S'KTHEHESH

Unë e di që më s'më kthehesh.
Ndaj dhe lotit i them ''Shter!''
Koha pas nuk mund të kthehet,
Sërish të dua si atëherë.

LARGOHU!

Largohu prej meje!
Shkoji kësaj bote larg!
Për mua s'ndjen dashuri.
Për mua... as mall.

Mos sajo pretekste!
Arsyeja mjafton.
Çfarë doje ma rrëmbeve,
por shpirtin s'ma merr dot, jo.

PERSE?!

Përse?!

Përse vallë ndiej kaq mall?

Kurrë s'të thashë ''Të dua!''

kur të kisha pranë.

Përse?!

Përse vallë kur të kujtoj buzëqesh?

Kurrë s'e pranova se diçka

mund të kishte mes nesh.

Përse?!

Përse vallë tani më vjen të qaj, ulëras?

Kam veç një dëshirë,

të kthej kohën pas.

ORËT

Në botë,
do mbledh gjithë orët.
Në botë,
asnjë s'do le. Për besë!

Kur të jem me ty,
do t'i ndal të gjitha.
Kur ti të shkosh,
do t'i kurdis shpejt.

Po nëse s'vjen?
Ç'më duhen orët?!
Koha..
Vlerë më s'do ketë.

Nëse ti vjen,
do ndal gjithë orët.
Të rri me ty,
gjithë një jetë.

Elda Koço
1996

U SHUAN

Lumturinë ma morën.
Zemër e shpirt ti.
Shpresat krejt u shuan.
S'do jemi kurrë të dy.

Elda Koço
1999

SHKATËRRIM

Kur e nesërmja u bë e sotme,
(Në të aq shumë kisha shpresuar!)
Ti erdhe plangprishës,
çdo gjë në çast u shkatërrua.

Elda Koço
1997

LARG GJITHÇKAJE

Sa do doja,
të isha diku,
larg gjithçkaje!
Për një çast,
larg botës.
Më pas,
atje ti...
Do kuptoja,
ç'isha pa botën
dhe bota pa ty.

Elda Koço Gjini
1996

DRUHEM

I trembem buzës që dridhet.
Ç'do t'më thotë sërish?!
I trembem shkëlqimit të syve.
S'ndriçojnë kështu të mit.
I druhem dashurisë,
s'mund të dashuroj si ty.

Elda Koço Gjini
1995

FRIKE VITESH

S'dyshoj në dashurinë tënde.
E sigurt jam në timen.
Por frikë kam,
frikë se na e rrëmbejnë vitet...

Elda Koço Gjini
2000

KESHTU?

Psherëtima...
Pëshpëritje...
Qetësi...
Kështu do jetë gjithmonë,
për ne të dy?

Elda Koço
1995

MUZG

Tretet drita,
ca nga ca.
E mbulon muzgu,
pak nga pak.

Ti pulit sytë,
fap e fap.
Me buzëqeshje,
më ndjell pranë.

Elda Koço
2000

SHPIRT MBI FLETË

Mbrëmë,
ndezur e mbajta dritën,
në dhomë deri vonë.
Lexova poezitë e tua,
të bukura vërtet.
Një shpirt i tërë,
i derdhur mbi fletë.

Elda Koço Gjini
 1995

SYVE KAFE

Sykaltrat në poezi.
Syzezat në këngë.
Vallë për sytë kafe,
i bije kujt ndërmend?!

Elda Koço
1995

S'JE VETEM

Kur zhduket drita,
mbet' errësira.
Mos kujto se vetëm je.
Gjithmon në ty mendja ime.
Dhe zemrën... ti e ke.

VEC TY

Një zinxhir i pafund,
dashuri - urrejtje,
më lidh vetëm me ty.
Asnjë veç teje s'dua.
E askënd nuk urrej.
Veç ty...

DO KUPTOSH

Kur një dashuri,
vijon të jetojë,
gjithë qënia jote,
do të ndryshojë.

Zë i shpirtit thotë ''Kthehu!''
I ndërgjegjes ''Më fal!''
Zemra thotë ''Të dua!
Qëndromë gjithmonë pranë!''

Do kuptosh pastaj,
nëse vlen për ty,
a është veç një hije,
që nata do ta fshijë.


Elda Koço
1997

XHELOZI

S'është mall ky që më bren.
S'është mall, e di.
Aq kohë e lash pa emër...
Por, është xhelozi.

Dashuri - Mall - Xhelozi,
një trio e pandarë.
Kjo xhelozi e paanë,
dashurinë do të vras.